Energia nuklearraren eztabaida ez da baretuko
Ipar Ameriketatik dator albistea. Obamaren ardurapeko gobernuak 8.330 milioi dolar jarriko ditu datorren urteko aurrekontuetan erreaktore nuklear berri bi eraikitzeko. Three Miles Island-eko istripua gertatu zenetik hona, hogeita hamar urte zeramatzaten Estatu Batuetan batere zentral nuklear berririk egin gabe eta, azkenean, paradoxa bada ere, demokratek egingo dute errepublikarrek egin nahi zutena.
Batzuok eta besteok darabiltzaten arrazoiak ez dira, jakina, berdinak. Errepublikarrek klima-aldaketa ukatzen dute eta, zer gerta ere, ekonomiaren garapena aldarrikatu. Demokratek, ostera, klima-aldaketaren arriskua azpimarratu ezezik, CO2 ixuririk ez duen energia “garbitzat” jotzen dute nuklearra.
Gaur egun 56 dira munduan zehar eraikitzen ari diren erreaktore nuklearrak, Asian batez ere. Hain zuzen ere, 21 Txinan, 6 Korean eta 5 Indian., Iran-en zertan ari ote diren kontuan hartu gabe. Horrez gainera, Japonia betidanik agertu izan da energia nuklearraren aldeko, Europan Frantzia bezalaxe.
Zalantzarik ez gero Obamaren erabakiak erabateko eragina izango duela energia nuklearraren gaineko eztabaidan. Inork ez du ukatzen hurrengo hogeita hamar uteko erronkak energia fosilen, berriztagarrien eta nuklearraren arteko “mixa” eskatuko duela. Eztabaida, inon egotekotan, tarta-banaketan dago. Baina Nazioarteko Energia Agentziaren arabera ez omen da oraingo aldean, ehunekotan behintzat, aldaketa handirik izango. Hiru energia-motak behar izango dira, hori bai, eta hiruetarik orain baino dezente gehiago gainera. Energia nuklearraren eztabaida ez da, beraz, berehalakoan baretuko.
Three Miles Island-eko istripuaren ondotik, hogeita hamar urte zeramatzaten Estatu Batuek batere zentral nuklear berririk eraikitzeke