Sei kilowattetik bat nuklearra
Garoñako zentralaren gaineko ezpaiak ez du soilik indar nuklearrari buruzko eztabaida eragin, baita modelu energetikoari dagokiona ere. Hau da, funtsean kontua ez da energia nuklearra bai ala ez, zein izango ote den hurrengo belaunaldiaren mix energetikoa baino. Eta horretarako, guztiok ere muzin egin beharko diogu populismo merkeari.
Populismo merkea baita, besteak beste, agintarien erantzukizun eta lidergo urria, oposizioaren hipokresia, hiritarren kontzientzia falta, proposamen alternatiboen alternatibarik eza, erruak beti inori leporatzea, “ez nere etxeondoan” delako filosofiaren praktika, argindarra kostu preziotik behera ordaintzen jarraitzea eta, zer gerta ere, urtez urte gizarte zibilaren energia-kontsumoa gehitzea.
Etorkizunari begira, energiaren erronkak eztabaida latza eskatzen du, energia fosilen, berriztagarrien eta nuklearraren arteko oreka aztertuz. Segurutik inork ez du zentral nuklearrik nahi bere etxe ondoan, baina hau egia izanik, egia ere bada gaur egun munduan kontsumitzen ditugun sei kilowattetatik bat nuklearra dela.
